Dr Entscheid nomau mi Rucksack ds packä isch dismau eifacher u unkomplizierter gfauä... Äs isch mega gäbig wemä ni wider aus mues neu choufä... Uslagä hani auso sodssägä kener gha... O d Routä dismau eifach gfungä... Gibä mir 14 Tag wanderä drum bietet säch vorauem Porto bis Santiago a...

Flug isch buechet u Wanderschue si parat am 20. Ougschtä flügi u am 21. loufi los...

U iz geits los... Ufä Zug bini gsecklet, da ig wi immer eher spät dran bi gsi... Packt hani plan u eher sytemlos... Positiv: Mi Rucksack isch sehr liächt dismau... Negativ: Ha natürläch äs paar Sachä vergässä... Wi viu wird säch no usästeuä... Aber ds wichtigschtä Piguerpass Pass u Gäud hani... Porto i chumä...

Voila mit ärä Stung verspätig bini ds Porto glandet... U Ced i ha imfau us erschts ds Meer gseh😂

Mis znacht... Eifach geil di Portugisäschi Chuchi...

U när zum Thema allei reisä... Woni bi bim Taxistand agstangä het säch äs dütsches Päärli über d Chöschtä vom Taxi gstrittä u da hani mi igschautä unä abottä ds Taxi ds teilä... Chum im Hotäu achohet mi dr überfründläch Receptionist ufenes Bier igladä... u woni mi anä bar ha gsetzt für öpis ds ässä hani dr 70Jährig Miguel kennä glert ä Maler wo mir sini läbesgschicht 3 we nid 4 sprachig hetverzeut... Soviu zur Einsamkeit bim reisä...

Hüt am Morgä bini gweckt wordä vo 2nä Mitpiugerinnä... Beides Dütschi um di 50i... Di einti d Anne het säch churzerhand entschlossä mit mir richtig Innland ds Loufä... Di meischtä loufä nämläch ar Küschtä na... Ohni Pfilä ds gseh wo dr Wäg markierä loufä mir los... Mi orientierigssinn seit mir ds mir immer nordöschtläch müässä loufä... Irgendwenn gseh mir Pfilä u wüssä mir si richtig.... Churz vor usgang vo Porto zeigä 2 Pfilä in entgägägsetztä Richtigä... Mir irrä umä wüw mir bim eintä Pfiu eifach ke 2. gseh... Schliessläch fingä mir ä Wäg... Irgendwenn faut mir uf ds es eifach iz gd chli viu öschtläch geit... Leider merki när ds es no ä 3. Wäg git... Merci Reiseguide ds du ds mit kem Wörtli erwähnt hesch.... Di nächschti Stadt Maia heisst si dörfä mir bi 36 grad ohni Schattä eifach uf Asfaut loufä...

I chumä mir vor wi Moses wo säch ir Wüäschti het verirrt... D Anne woni numä no Ännelä nennä isch mir dankbar ds ig sä dür di Stadt lotsä... Ca am Mittag gseh mir bi luschtigä 40Grad u gfüäutä 50!!!!! wider ä Pfiu... Mir si iz absoluti Maia kenner... 

I gloub di erschtä Tag si eifach ni miner! Bachnass u dehydriert chömä mir irgendwo nach Maia ines Restaurant... Fragä mi ärnschthaft wieso ig mir ds atue! U äs git wider Änglä ufem Camino!!! D Mamavom Restaurant umsorgt üs macht mir äxtra äs Toast... U när isches bau abartig! När bini wider fit winä Turnschue! Mir loufä i derä Hitz meischtens ar Strass na... Merciii... Isch gar nid heiss... Unär nach Ewigkeitä erreichä mir üses Zieu Vilarinho... Ir Herbärgä nämä mir äs Privatzimmer... Hei gd ke luscht mit 10 witerä Piuger ds pennä!

Mir si hüt ca 32-35 km gloffä dank üsem Umwäg...

Am 6i weckt mi d Ännelä... Früäh gömer los mir si geschter o früäh ids Näscht... Aber mä gloubts ni üsi Zimmernachbarä hei auso um punkt 5i d Herbärgä verlah... Äs Taget langsam wo mir losloufä... Chli näblig isches was mega agnähm isch!

Über Fäuder über risägi Burereiä füärt üsä Wäg... Begleitet vo ganz wundervollä Pschüttidüft verfougt vo bestialischä Kläfer versuechä mir üsä Caminotrott ds fingä... Äs faut mir mega schwär...Di32kmvo geschter di si eifach doch nid gd so schnäu wäggsteckt... U mini Füäss brönnä... U Bravo Platerä 1 u 2 links u rächts ar Fuessohlä jewils entstöh.... 🤮... 

Äs isch zum Pägä... Immer no über 200km u äs wird heisser u heisser u ja mir hei wider 40 Grag im Schattä u ar Sunnä wirsch eifach numä grillet.... Gopffridli!!!! Am 12 trotz ca 3l Wasser u ä haubä Liter Cola isches mir mega schlächt!!!

Äs geit mir ächt verschissä... Bi aber ni di einzegi! Begägnä viunä Piugr mit Chrämpf wo mega Dehydriert am Schattä umäligä... Mir längt äs Sändwich u när geits mir gleitig wider besser! Am Nami tüä mini Blaterä so weh ds ig wider mau darf uf Tevas wächslä... U ja tragä diä natürläch uf di oberpinlächschti Art... Genau mit Sockä...

Nach ärä ewigkeit fingä mir ä Herbärge mit Dopuzimmer u Wöschmaschinä u eigetem Bad👍🏼👍🏼👍🏼

Wider fasch ä 30er... I bi Muertos mini Füäss flatü aber ig bi immer no uf däm Camino u dä Cheib geit no Ewig... Ds Schönä isch afä Santiago isch unger 200km entfernt🎉🙏

I fingä äs het säch glohnt... Bim chrütz hocket übeigens mini liäbi Ännelä...

Chli vom Winde verweht... Aber i ha sms becho ds ig auso ganz leid usgseh uf dä Biuder.... Loufet dir mau i derä Souhitz zwe 30er i 2 Täg mit ca 10kg Gepäck😡.... Drum Bewisfoto... Äs geit mir guet... 

Am Morgä am 6i verlö mir üsi herbärgä! U üses Vorhabä isch gross über 30km möchtä mir zrügglegä hüt... Äs isch no dunku womer d Stadt verlö... Äs isch schön chaut wider chli näblig... Äs geit usä richtig Land... 

Tämperaturä ligä um di 24 Grad... U när wider am haubi 11 aus häts dr Tüfu gseit.. Bratet ds wider abä... Du chasch gar ni so viu trinkä wid schwitzisch... U da ke hungr hesch wüws so heiss isch wirds dr mängisch eifach angers... Usserdäm hei mini Füäss wider ganz wüäschti Blaterä u bi 2 Zäiä isch eifach dr Nagu Blau... Unger grossä Schmärzä u viu Zuespruch vo mirä liäbä Tempomacherin Ännelä erreichä ig üses Mittagszieu...

Ungerwägs begägnet mä hiä ni soviunä Piuger! Aber denä womä begägnet di si eifach ds 10ni! D Ännelä git nä immer di geilschtä Nämä... Dr eint wo ca 50i isch immer i Radlerhodä louft u Oberschänklä het winä Marathonleufer däm seit si unser Sportsfreund... U genau dä gseh mir iz immer we mir am Ässä si... Dä dänkt sini Sach äuä o😂😂😂... U när hei mir hüt no ä säutä doofi Gstaut gseh... Äs naivs dütsches Tüpfi wo üs im ärnscht gfragt het öb si sonä Piugerpass brüchi... Gschminkt u i churzä Läderhosä isch si gloffä u het so ä Hipsterattidüdä a Tag gleit ( aues isch hiä super u dr Wäg isch ds Zieu). U isch ganz erstunt gsi ds mir Puffertäg ibouä hei bir planig wüw si sich nid überleit het ds si ja chönt Chrank wärdä oder viläch eifach mau ni ma😂🙈... Jedäfsus nennä mir diä Bumsebiene🙊

Nach Schuäwächsu Chleiderwächsu ect. geits witer... U ändläch gfaut mir dä Wäg!!!

Wüw plötzläch si links u rächts vor Strass Wiitrubä u Wiiburä u Degustationshüsli... U mä louft nüm numä dä heissä Strassä na... D Ännelä u ig mir verzeuä üs Gschichtä usem Läbä ungerwägs... Süsch git si oft ds Tempo vor u ig navigierä... 

Irgendwenn chömä mir a üsem Zieu a.. Ponte de Lima...

Lut Reisefüärer sis 34km... Aber ja... I bi auso i 3 Täg iz jedä Tag ä 30er gloffä🎉... Hoffä cha morn no ufstah🙈

So fertig Luxuspilger... Massäschlag isch agseit... Mau chli Gäudsparä choschtet numä 5.-

Am Abä hei mir mit 2 Kanadier zämä gässä... Dr Danielle u ihrem Sohn am Taylor... Di 2 si ächt witzig u mir hei ä luschtigä Abä gha...

Dr Vorteil am nä 20er Saal - ä Wecker muesch ni steuä... We öper wach isch... Si aui wach😂... Drum startä mir am viertu ab 6i.... 

Mini Tempomacherin git wider Vougas! Aber hüt loufä mini Bei guet u i cha guet mitzieh... Äs wird wider heiss hüt! U da ig di letschtä 3 Täg sodsägä i Badhosä bi gloffä o we ig eigentläch ni so schwitze het o mini Hut müässä Tribut zollä! Wolf isch agseit... U zwar eigentlich überau wos näht het... oder dr Rucksack härä chunt... Fingä so Gmeinschaftsduschinä eigentläch ni so prickelnd... Aber geschter bini ömu lang ni di einzegi gsi wo gschrouä het unger dr Duschi wüw eifach aues brönnt... Usserdäm si haut wider mini Füäss ds Problem... Blaterä u zwar 6... Obwou ig würk abkläbt ect ha😡... Ds heisst i wanderä di nächschtä Täg in Tewas mit Sockä natürläch...

Di hütegi Tour füärt üs bärguf... Äs isch heiss i ha 10kg hingä ufem Rüggä u mues vorauem o mi ufäschleppä... Mi Körper brönnt... Aber so masochistisch wis tönt... Äs isch so schön... Äs geit viu dürä Waud... Mä gseht immer wider Piuger o wes dütläch weniger si aus letschts Jahr... U vorauem d Ännelä fägt... Di Frou louft wines Bärggeissli di Höger ufä u ig eher wines Rhinozeros hingä nachä... 

Äs geit würk steil ufä... U zwar über Stundä... Aber hüt bini würk guet druf äs wird mir ni Chotzeländ wäg dr Hitz... Drum si mir am Mittag a üsem Etappäzieu... Zmittag ässä mir mit ganz viunä Piuger aues jungi wo allei dä Wäg gö... Si blibä aber aui da über Nacht... I mues wider mau mini Blaterä verarztä u denä Lüt wo ds gseh wirds mau wider angersch... Z letscht mau isches ni angers gsi... Mä mues mängisch haut eifach dürä im Läbä u ufem Wäg isches ni angers... D Stöck bruchi teilwis us Chrückä aber mi liäb Tämpomat d Ännelä tribt mi ungerstützend wyter... 

D Ännelä ret ä chli gebrochä Änglisch u när chönt si no Sorbisch süsch isches chli schwirig für si ds Komunizierä drum bini o irä Übersetzer... Mit dä Iheimischä redi mis berüämtä Portugiesisch Spanisch Italiänisch u zwar düränang u eifach ä wichtigä Gring machä... Si verstöh mi ömu praktisch usnahmslos... Eventuell chönts o a minä pantomimischä Fähigkeitä ligä😂...

Obwou dr Wäg happig isch wäg minä Füäss schafä mirs glich no ads Zieu...

Wider fasch ä 30er aber drfür Bärguf u ab... I bi wider kabutt... Üsi Herbärgä drfür isch super... Gfüärt vo ärä dütschä Familiä... U härzig mit 14 Bett wird aber öpä ni vou... I hoffä i cha mega guet schlafä...

2 Italiäner hei säch no bi üs iquartiert... U mir hei ä schönä Abä gha...

Hüt gö mir aues langsamer a... Da di letschtä Täg umega asträngend u warm si gsi wärdä mir hüt ni so viu loufä... Mir stöh aber trotzdem früä uf... U när geit ds piugerä wyter...

Da mir geschter wyter aus angeri Piuger si gwanderet chömers langsam aga... Mir chömä ca am 10i ds Valenca a ds isch di letschti Stadt in Portugal 🇵🇹...

Mir schlenderä dürd Gassä wanderä über d Murä vor autstadt u när verlö mir via Brügg u scho fasch chli trurig Portugal... 

U da mä ds Spaniä ä Stung mues vorsteuä hei mir scho 1 am Mittag... Denn tüä di offiziellä Herbergenä uf u mir schnappä üs äs Bett ir beliäbtä Herbärgä ds Tuy..

Mir si auso ds Spaniä u hei Zimmläch gnau d heufti vom Wäg hinger üs... Dr Nami wärdä mir gniässä zum Füäss heilä u Idschoufä u chli ds schlafä wüw Morn geits früä los... U när geits immer wyter richtig Santiago... 

Zyt für Bilanz ds zieh... I bi ca ir Mitti vom Wäg...

Leider stimmt km ni ganz da dr Köbuwäg chli angers verlouft u dr eint oder anger Wäg chli lenger macht...

U ca 110km ligä iz öpä no vor üs... Santiago i chumä...

Geschter am Abä hei mir wider mau üsi Kanadier Mueter u Sohn d Danielle u Taylor gseh... U da mir ja geschter viu si ghocket glägä hei trunkä u gässä hei mir mit ihnä natürläch nix angers gmacht...Schinbar gniässä d Ännelä u ig dr Ruef mir sigä numä am Sufä sehr... Mir hei wider irä öffentlächä Herbergä gwohnt sprich ca 30 lüt im glichä Rum... So Massäabfertigungsduschinä wod definitiv keniGheimnis meh vo nä nang hesch... Tja drfür choschtä diä ir Regu 6 💶... Wod ds Portugal 🇵🇹 no birä privatä Herbergä bi 10 Euro bisch gsi bisch de ds Spaniä scho bi 13-15 pro Person drfür hesch haut richtegi Duschinä würk gueti Madrazä niä meh aus 8 lüt ir Regu ä Wöschmaschinä... Ds isch dr Grund wieso mir so chli abwächslä... Ab iz isch d Jagt nach Stämplä eröffnet... Äs het viu meh Piuger ufem Wäg... Si leider nüm di einzigä... Dr Run uf di billigä Bett sprich di öffentlichä Herbergä dä isch vou im Gang... Mä muess säch vorsteuä: Am 12 ca tüä di Herbergä uf ab 14:00 si ir Regu di Rund 50 Bett wäg... Ds isch dr Grund wieso iz üsi Ettapenä chliner ghautä si... 

Hüt wachi aber früäh uf ca viertu vor 6i loufä mir mit Stirnlampä los... Da mir ja Geschter di spanischi Gränzä hei passiert isch ja öpä klar ws disi Nacht isch gsi... 1. Di ganz Nacht ä uhuerä Lärm u 2. Reinigungsproblem si itroffä... O dis Mau schinä ig ungloubläch viu Balascht müässä abwärfä... Ds spanischä Ässä isch ja würk mega fein! Aber haut umega ölig/fettig u mi Magädarmtrakt schint chli überforderet dsi drmit...

Am 11 si mir a üsem Zieu O Porrino... U entscheidä üs für nä privati Herbergä...

Zyt für wöschä, wundversorgig u schlafä😂👍🏼... Äs isch ja schliessläch Sunti u Santiago chunt immer nöcher...

Äs isch vor dä 6ä wo mir d Anne mitteilt si loufi de afä los... Dr chöt euch ni vorsteuä wi rächt mir ds isch wüw ig ma gar ni hüt😂😂😂... I dräiä mi no chli hin u här u ca am 7ni loufi los... Äs isch dunku u i gseh trotz Stirnlampä di cheibä Pfilä eifach ni! Angernä Piuger geits glich... D Andrea woni per Zuefau triffä fingt dr Wäg o ni würk... Auso Irrä mir chli zämä umä... O si ä dütschi 40i us Bayern... Si isch bis iz ar Küschtä nachägloffä,.. O dä Wäg chönt mä ga... Mir verzeuä änang chli vom Läbä u vom Wäg... I gseh immer wider bekannti Gsichter... U plötzlich isches Morgä u d Sunnä geit uf...

U när wird dr Wäg wunderschön! Äs geit bärguf u bärgab... U dür Wäuder u chlini Dörfli... Eifach ä Troum...

Mini Füäss si hüt super usem grossä Wolf wird langsam ä chlinä Wolf u mini Bei tragä mi je lenger desto besser... Hüt isch wider ä churzä biz... Mis Zieu Redondela äs wunderbars chlises Stedtli isch schnäu erreicht...

U vor Herbärgä wartet d Ännelä😂... D Andrea louft no chli wyter... Scho gly wärdes viu... D Anne u ig hei aber d Poleposition... 💪 Äs isch haubi 12i d Herbärgä öffnet ersch am 1 aber isch sodsägä scho usbuechet... Si het 35 Bett choschtet 6 Euro... Isch haut äs schnäppli...

U da mir ja eh nüt angers ds tüä hei...

De Proscht... U d entspannig faht a... Ds isch äbä o Köbuwäg! U i ha schliessläch ja Feriä!

Ab iz gseni Santiago uf dr Chartä... ds Zieu chunt immer wi necher...

D Nacht isch schreckläch gsi! Sämtlächi Schnarchpilger si bi mir im Schlafsau gsi... Gopfridli de schlafsch eifach scho ganz verschissä! Am 6i stani gnärft aber trotzdem uf... U ja merciii äs schiffet... I bi wüätig dsi ni ha chönä pennä u wüätend dsi scho uf mues... U trotzdem loufi los... Numä nomau zum sägä.... im rägä..

I ma gar ni äs isch einä vo denä Täg wot weisch hüt wird hert... U när geiz no bärguf... Numä faus es no ni erwähnt wordä isch... Äs rägnet! I bi hässig wüw ig wider mau chichä wines Rhinozeros. Drum machi einä uf Dario Colognia im Summerträning u seklä dä doof Bärg ufä... Dobä bini bachnass u mues doch tatsächlich ufd Ännelä wartä. Si ma mir hüt numä schwär nachä... Nach däm fürchterlächä Astig geiz wider chli bärgab u d Sunnä geit uf u äs hört uf rägnä...

D Landschaft isch wunderschön u si treit mi chli. Jedoch sis herti km. U irgendwenn bräntet d Sunnä o wider ganz schön.. Churz bi gottäfroh wo mir vo derä Herbärgä si! 

Mir si wider 1.5 h ds früä aber wi mä gseht ni di 1. wo wartä... 

Für morn steit Caldas de reis ufem Programm u ds isch sehr ungünschtig vo dä Herbergenä här. Fasch ke Plätz u da mir ni wei stresse hei mir iz eini vorbuecht...

Am Nami bini no chli ga Pontevedra entdeckä... Ä wunderschöni Stadt! 

Hüt am Morgä isches sooo schön... Aui stöh uf u hetzä u ig ud Annelä blibä ligä u hei gar nüt ds Stressä... Äs isch aber trotzdem no fischter womer nach dä 7nä usä gö... Dr Wäg füärt üs a Landstrassä vrbi... Mini Bei mögä i secklä scho fasch chli... Geschter hani mir no nöi Sporthosä zuechä ta da mini dürägripset si ud Näht lö la ga... Äs het ni numä schöni Wägli ufem Köbuwäg mängisch muesch äs paar Kilometer ar Houptstrass entlang u de dänki mir mini Sach aubä scho we sonä risä Laschter gfüwti Zentimeter vrbi rast! Aber sobald dr Wäg vor Strass wägfüärt gits wunderbari Wägli...

Langsam bini igloffä... Lidä tueni nüm so... Aber äs git natürläch immer no km wo herter hei aus angeri... U jedä het chli sini Lidä... Viu behandlä ufem Wäg iri Füäss oder Kneu... Mä merkt ds es am Ändi zue geit... Äs si Schaarä ungerwägs vo lüt... Äs het o dises Jahr ganz viu wo mit Tagesrucksack ungerwägs si.. 

Üses Zieu Caldas de Reis erreichä mir ca am 1... Üsi Herbärgä für hüt sehr Luxuriös!

Pro Person 12.- chasch gar nüt sägä! Ud Husherrin isch d Marisol het natürlich ä Brüätsch ir Schwitz sowi fasch jedä us Galiziä igend ä Verwantä ir Schwitz het... Si umarmt u küsst mi uhärzig u bedankt säch di ganz zyt ds ig spanisch versuechä ds redä... 😂😂😂 Eifach köschtläch...

Ni so viu wider aber äs längt... D Duschi rüäft u vorauem mis Bett...

Geschter hani Entscheidigä troffä... I ha nämläch o für hüt abä ä Herbergä buechet... U i ha mi entschidä ds ds Santiago mi Wäg ni fertig isch... Dismau wirdi bis ads ändi vor Wäut loufä... Sprich bis nach Fisterra was ar Küschtä ligt... Da o dert ig ni di einzegi wirdä si hani mir mini Herbergä vorbuechet... D Ännelä wird mi nid wyter begleitä irä Wäg wird ds Santiago fertig si... 

Hüt am Morgä isch mirs widermau ds früä... Ig wovsüsch höchschtens 8h schlafä dräiä dürä weni am 10ni no ni schlafä😂... Äs geit auso erneut los... Rucksack alegä Wanderstöck griffä u Wasser uffüllä u los geits. Haubi 7ni isch abmarsch... Mit Stirnlampä im dunklä... Mir loufä ni allei äs si o hüt viu ungerwägs... Es geit über chlini Bächli... Woni mi scho jedes Mau gseh badä weni über d Steinä hüpfä... Gar ni so eifach mit 10kg ufem Rüggä... U irgendwenn geit d Sunnä uf...

U när geits wider richtig Zivilisation... Ds heisst Bar Wc Pousä... Irä Bar schisst mi di einti Servierdüsä de mega zämä wüwi mi ha erfrächt ufs Mannäwc ds ga... Woubemerkt äs het äs gmeinsams brünnli gha u eifach 2 Abschliessbari Schisshüsli... U da Frouä ke ahnig was machä ufem Wc u eländ lang hei hani haut ds angerä gno...🤷🏽‍♀️ Häterä gärn uf Spanisch gseit ds nächscht Mau düäg ig de mini Reinigusproblem uf ihrem Tresen behäbä...🙊 Hani aber ni... Wyter füärt üsä wäg a ganz viu Chiuchenä vrbi... U ungerwägs fö d Annelä u ig chli afä Singä u plötzlich singä ganz viu i verschidnigschtä Sprachä... 

Mi Füäss brönnä aber hüt isch glücklächerwis ä churzi Etappä... Morn Wird hert wärdä! Drum afä mau Füäss hochlagerä ir Herbärgä...

Morn gits 25km bis Santiago... I hoffä ds igendwiä vor dä 3 ds schaffä... När muesi astah fürd Compostela... När i mini buechti Herbärgä ga duschä chleider wäschä när z Nacht ässä u Abendmäss... Ja morn wird umega asträngend! Am Samschti geits när für mi gd witer wüw mis nächschtä Ziu ligt ca 100km entfernt... Ds ändi vor Wäut...

Äs isch komisch womi d Annelä weckt... Si weckt mi nämmläch zum letschtä Mau... Äs schisst mi hüt so richtig a zum Ufstah! Sones Piugerbett cha o mega bequem u warm si am morgä am 6i... Aber imuess... Uf los geits los haubi 7ni isch abmarsch u mini Tempomacherin git ds Tempo wider mau vor... Ig schrissä zwar widermau ä Lätsch da ig eifach ke Morgämönsch bi u genereu eher Blei im Arschstatt Gold im Mund ha....

D Gügglä vö ersch afä Chreiä wo mir dürä loufä... U i cha euch sägä sonä pägendä Güggu würd bi mir ni lang läbä! Mir loufä vrbi a Burähöf.. U da griffi doch mau ds Thema Hünd uf... I ha im grossä uganzä sehr gärn Hünd. I fragä mi eifach wieso di Spanier säch gd müässä Rotweiler zuechä tue? U meischtens gd 2. När gits no di bsunders närvigä Hünd... Ni gröser aus äs Merseuli aber im Härz imMinimum ä Rotweiler oder süsch sonä Kampfhung... Ds si diä Sortä woder nachäsecklä u umäkläffä winä morä... Mues asträngend si so möchtegärn Wachhund i Handtäschäformat... 

I quälä mi wider... Aber o hüt geit d Sunnä uf... U Kilometer um Kilometer chumi Santiago necher...

Aber i sägä euch di Steinä si Verräter! Je weniger si azeige desto müäsamer wird dr Wäg... Äs geit bärguf u ds scho syt am Morgä! Mini Füäss brönnä mini Bei wärdä schwär... D Ännelä zieht mi hüt ni... I zieh si... U churz vor Santiago faht si chli afä schlärpelä u fötelä... Si wot ni würk acho... U irgendwenn churz vorem dürädräiä loufä mir ds Santiago i! Mir gseh viu Piuger ungerwägs womer immer wider hei gseh... U plötzlich steisch wider vor derä Chiuchä... Tränä fliessä... Emotionä chömä... 1000 Gedankä... Nid beschribbar... 

Ig weis ni was ganz gnau dr Grund isch für dä Wäg... Öbs ds Gfüäu isch ändläch wider mau ds Gfüäu ds ha öppis gschafft ds ha... Oder öbs eifach ä bestätigung isch... Oder öbs ds feeling ir Natur dsi isch... Oder ds mit mau weni ds Schlag cho... Oder neui Lüt kennä ds lehrä? Öbs ds Gfüäu isch wo di Chiuchä uslöst oder d Verzwiflig teilwis? Oder viläch aues zämä... Ke ahnig... Viläch isch äbä o au ds genau ds wo dä Wäg uszeichnet..

Zurzyt stani a für mini Compostela... U schribä drzue mi Blog... Tja so isch ds Piugerbloggerläbä... Mä isch immer am büglä😂😂😂😂....

I möcht de numä sägä bi de 25km gloffä hüt wüw dä Superpiugerwäg het üs natürläch i Schleifä id Stadt gfüärt... Merciii Köbu!!!!

Compostela hani abghout... Pilgermäss hani bsuecht... Gratiskonzärt glosst iz no äs guets Glas Wiii u när ab in die Heia... Wüw morn wird läng...

U am Abä bini nomau zu derä Chiuchä... U ha d Andrea wider troffä... 

Dr Abschid vor Ännelä isch mir schwär gfauä! Hei ds aber churz ghautä... Ab iz bini würk allei ungerwägs...

Hüt am morgä lütet dr Wecker... Leider isch ke Ännelä meh da wo mi weckt! I tue mi auso alegä u öppis nach dä 7nä gani los... Äs regt mi mega uf ds ig dä Wäg mir no ha vorgno wär so gärn im Bett blibä! Scho geschter hani diversi stichä gseh bi id Apotheke u di hei gmeint äs sigi Muggä hüt bisst mi aber eifach dr ganz Körper... I ha sichr wider di Bettwanzä becho... Ga drum Geschter am abä no i di 2. Apotheke u di sägä o wider Muggä... Auso gloubä mir ds haut... 

Di Ussicht schint mi aber genau nid ds beflüglä! I ha ds gfüäu i loufä winä Schnägg... I bi müäd u loufä allei ke Piuger wyt u breit... I verfluechä dä Wäg! Äs geit numä Barguf u Bärgab... I köderä mi inner Souhung mit Colapousänä... aber nützt ni würk öppis... I regä mi uf... Über mi säuber... Chum stani wider so ufemnä Bübi gseni scho ds nächschtä... Gopffridli!!! Igendwenn schreii eifach numä no... Äs wot o wider um di 35 Grad... merciii

Obwou ds es landschaftläch gseh mega schön isch fäut mir definitiv d Motivation hüt! U mi bisst dr ganz Körper! U d Ännelä zieht nid hüt u i watschlä vor mi härä... U fluechä... Wüw ghörä tuet mi ja eh niämer... Churz vor Mittag gseni de immer wider mau chli Piuger... Am Mittag gani erneut inä Apotheke... Dert isch ä Dokter... Är meint o sigä Muggästichä chöntä aber evtl o di blöde Schissficher vo Bettwanzä si! I gibä däm Herr mit dä Wort Spray para todos mosqitos muertos no dormier muertos u no mit em Zeichä umä haus ds verstah ds ig wider sonä Todesspray bruchä!!! D lüt im Ladä töts fasch vor lachä wini da hantierä... 

Ir Mittagshitz geits wider Bärguf! I ma scho lang nüm u schwitzä winä morä mini Füäss tüä weh u i loufä wider allei... Ächli bewusst wüw i ha ja da schono äs paar Sachä zum aluegä mit mir... I grännä mir chli ids Hemmli... Irgendwenn gani mir säuber ufä Sack u wöui so wüätend bi seckli dä Bärg gd ufä... Äs söu ni dr letscht si für hüt... I überlegä chli wyter... Isches würkläch schlau gsi ds ig mi Job ha kündet u iz nomau äs Nachdiplom machä u wider mi ischränkä... Wärs ni gschider oder eifach eifacher gsi chli gads schaffä mi viläch finanzieu chli meh ds stabilisierä... Aber genau ds bi schinbar ig... Immer d Herusäforderig suechend mir immer viu ufbürdä u mi i Arbeit stürzä... Äs chunt dr nächscht Bärg... Mini wuet het hüt kes änd... Colognia wär stouz uf mi... I verblibä mit mir ds ä Veränderig mir ganz sicher guet tuet! Äs isch 3  woni völlig am Aschlag wider mit Badhosäfeeling totau entchreftet bi mirä Herbergä achumä! Ha dänkt chömi nüm a... Lut mir hani hüt zmingscht Stockhorn Niesen u Matterhorn erklumä.. 

Ir Herbärgä acho geits radikau zur sach... Obwou ig aui chleider gd ersch gwäschä ha wird dr ganz Ruchsack usänang gno u igsprayt u was cha gwäschä wärdä wird Gwäschä u Tumbleret... Ds söu nämmläch di schissficher ersch rächt zur Strecki bringä... Unger dr duschi wird mir ds Usmass bewusst i bi würk übersäit mit Stichä wo würk usgseh wi Muggästichä... Aber i hautä dran fescht hüt spili Massämörder... Muertos u zwar todos schissägi Insektos!

31km sys hüt gsi u i hoffä ds ni numä ig sondern o aui Insektä i mirä nöcherä Umgäbig Muertos si!

Geschter hani 2 dütschi kennä glert... D Funny ud Magda beides Theologiestudäntä i mim auter.. U hüt bini mit denä 2 gloffä... Si loufä syt Leon sprich hei genau ds gmacht wo ig letschts Jahr... Mir heis u luschtig abr verbringä doch o kilometer eifach schwigend... Sogar ig cha ni di ganz zyt schnurä😂... Di 2 lö säch am Morgä zyt u ds passt mir o ganz guet... Ersch öpis vor dä 8i loufä mir los... U wider geiz barguf u bärgab... Tja... Nomau merciii Köbu! Scho am 10ni wird klar o hüt wirds wider mega heiss! U überä Mittag hei mir natürlich gd dä biz mit am wenigschtä Schattä u dä gröschtä Hüglä verwütscht... Abr d Ussicht wider mau Bombä!

Dr running Gäg isch ds si mir die Heidin sägä da ig geschter zum erstunä vom ganzä Tisch ha gseit ds ig ke Katolikin sig😂😂😂... Faus öpr dä Wäg mau möcht machä denn ds ni a di grossi Gloggä hänkä...Äs si de drum scho paar Fragä cho wieso ig de gnau irä Wäg machä... Woni de ha gseit i sig auso trotzdem o Chrischtin u dä da obä ( auso Gödu) sig ja öpä dr glich... Hani numä no äs stumms nickä wahrgno... U di 2Theologinnä nennä mi syt denn liäb gmeint die Heidin...

O hüt hani mit em innerä Souhund mi müässä duellierä! Aber ussert am Mittag hani guet mögä... I bi o hüt ir Herbergä wider ä chlinä Psycho punkto Krabutier Schissfichervernichtig... Sprich nimä ä bäsä u wüschä um mis Bett, besprayä mis Bett u när wird wider aues gwöschet... Muerto!!! U zwar Todos! 

U obwou di 2 dütschä eigentläch hüt 30km hättä wöuä machä... Hei si säch umentschidä u loufä iz mit mir ömu sicher morn ono... U ig schetzä di Begleitig vo denä zwonä würk o sehr...

25km ä solidi leischtig...

Nach äm nä luschtigä Abä u arä erhousamä Nacht geiz hüt wider churz vor dä 8i los... Mir si guet glunet u üsi Bei di loufä... U ig cha Schwitzerdütsch redä! Di 2 verstöh ds ohni Problem! Wüw d Magda het 2 Jahr ds Kriens gläbt ud Funny het ä Schwitzer Fründ gha! Äs isch ä sehr entspannti Rundi! Mir redä über Gott ud Wäut... Psychologisch Theologisch u aues mit ganz viu Witz u arä touä Prisä schwarzä Humor... I üsserä mi ganz diräkt wi immer über di katholischi Chiuchä... U si stimmä mir entweder zue oder akzeptierä mini Meinig ohni mi wöuä ds bekehrä! Ä luschtigä Punkt isch das ig immer vergissä ds si vorem ässä tüä bätä... Si fingä ds u witzig... Ufem Wäg loufä mir abr o ab u zue i grösserä Abständ zunänang... Diskutierä mit angernä Piuger, fötelä u jedi louft ires Tempo bis mir üs spetischtens ir nächschtä Bar wider iholä... Mir lachä viu u ds tuet üs aunä sehr guet! Äs isch di beschti Medizin wüw mini Füäss di lidä wider sehr...

Bärgli uf u ab geit üsä Wäg o hüt... Abr wider einisch meh isch d Ussicht dr Hammer!

D Gspräch mit denä 2 über Gloubä u Religion si teilwis sehr tiefgründig, teilwis poetisch u lö mi wider mau anä besseri Wäut la Gloubä... I bi froh ds Theologie frei dänkendä Nachwuchs bechunt wo da di autä Schubladädänker mau cha ussstoubä!

Dr Wäg isch hüt ni lang aber drfür wider mau asträngend... Doch mini Bei di mögä... Irgendwenn gseht mä ändläch ds Meer... Äs u schöns Gfüäu!

Mir hei scho gmerkt ds mir schnäu si gloffä u lüt hei ighout wo mir aber ufd Uhr luegä erchlüpfä mir aber scho... Üsi Herbärgä het eh no ni offä u di nächschti Bar isch umä Eggä... Dr Fau ischklar... 

Nachdäm ig ha Muertosspray nachschueb kouft ligi iz i mim Bettli... Nachem duschä wirdi no chli schlafä wüw morn sis zwar nüm viu km aber aues bärguf... 

18km hüt... U morn mä gloubts ni dr letscht Tag woni wirdä loufä...🙈

Hüt am Morgä isch ds ufstah ni ganz eifach gangä... Kes wunder ha geschter nid numä 1 Glas Wisswii trunkä... D Funny d Magda u ig mir heis sehr luschtig gha... Mir u när no sonä sehr überheblichäplagöri vom Schwarzwäldle teilä üs äs Zimmer... Horst nenni dä unmögläch Typ... Ä labertäschä sägi euch... Dä bini fasch nüm loswordä u när nachdäm är üs het vougstusset gha  ischer no ad Reception ga laberä... O settigs gyts...

Nachem nä guetä Zmorgä geits los! Natürläch widermau bärguf... Hüt hani gueti Bei... I cha mis Tempo hautä u äs isch nid ds warm... Ä optimalä Wandertag! Äs si ni viu lüt ungerwägs! U dr Wäg isch einisch meh wunderschön! O wes ufä u abä geit! D Ussicht isch wahnsinn!

D Funny ud Magda im Rüggä geits wyter u igendwenn gseht mä Fisterra i sirä ganzä Pracht... Tränä hani i dä Ougä woni uf di 2 wartä... Gänsehutmomänt pur!

Nachdäm ig mini Compostela bi ga Abholä hani mi iz i mis Hotäuzimmer zrüggzogä😂... Bi iz lang gnue Piuger gsi... Sones aständigs Näscht mues iz mau wider härä! Am abä hei mir wider Programm... Mir wanderä no zum Cap Fisterra wo der 0km Stei isch u wi scho erwähnt ds Ändi vor Wäut... U dert verbrönnt mä ir Regu no öppis... Schinbar wots rägnä... I wirdes gseh ob mini Ungerhosä brönnä...😂

Äs isch ganz komisch ohni Rucksack ds loufä... Äs isch viu liächter bau easy di 4 km di si schnäu gschafft! U när simer auso da am ändi vor Wäut...

Mir luegä ufds Meer... U äs herscht Stiui... Numä ds ruschä vom Meer ds Summä vom Wind... U üs wird klar... Üsä Wäg isch beeändet... Mir si bis ads ändi vor Wäut gloffä wyter geiz nüm...

Obwou ig ganz mängisch nüm ha dra gloubt das ig dä Wäg o cha beeändä... Ds igs o dismau bis ads ändi schaffä... Hanis glych igendwiä gschafft... Äs isch ungloubläch weli Chräft mi da teilwis hei atribä wytertribä voratribä uf däm Wäg... Teilwis für mi unerklärlich... Dr Wäg het mir widermau zeigt ds ig mir ruhig mau darf Vertouä... Viläch o minä Entscheidigä trouä u druf Vertrouä ds viläch eifach o mau guet chunt... Nachdänkläch hockä mir uf derä Klippä u luegä wid Sunnä im Meer versinkt...

Ca 350 km bini gloffä ca 24km pro Tag... 

U o we jedä Kilometer hert erkämpft u tür mit Blaterä zaut... Überwiegt ds Positivä u i bi gneigt drzue ds sägä dasis äuä wider würd machä😂🙈💪!

Hüt am Morgä bini ufgstangä ohni mir ds überlegä wini mir mini Füäss söu Tapä ds diä 20km im minimum chö loufä... Äs komisches Gfüäu! I stah uf zwar o am 7ni... Mis Zieu isch dr Bösbahnhof... Wüw hüt geits wider nach Santiago zrügg... Äs isch komisch Fisterra ds verla... Ds positivä isch ds d Funny u d Magda o mitchömä... D Bösfahrt isch lang... 2.5 Stung dür jedes Kaff... Chum ds Santiago acho geits o scho id Mittagsmäss... I möcht erwähnä i bi mit 2nä Theologä ungerwägs... Ir Mäss mit Theologä isches aber o kul! Hingergrundinfos... I weis ändläch was diä da vor eigentläch ganz gnau möchtä vo säch gä... I weis o wenn ig söt bätä u wenn singä... Äs isch umega luschtig mit denä 2nä... Nach dr Mäss u churzem shopping simer kabutt u müässä di spanischi Siesta ihautä...

U när müässä mir üs wider chli sterchä...

U när wirdi radikau...

Sprich i la Haar! Ä befreiig für mi... U när gniässä mir 3 no chli Santiago u fyrä üsä letscht abä... 

U mir merkä ds mir scho wider eher Tourischtä statt Piuger si...

Nach am nä wunderschönä Abä simer geschter guet glunet ids Bett.... U hüt am Morgä äs komisches Erwachä! Mir gö zämä zum Flughafä... Mir lachä mir schwigä mir weis ni ganz wahrha ds di Zyt ids söu beeändet si... Wehmüätig verabschidä ig mi am Gate vor Magda u vor Funny... I chönt grännä... Wosäch ds Gate schliesst isches ändgültig... Dr Köbuwäg isch vrbi!

Was nimi mit? Äs laht säch widermau schwär i Wort la fassä! Aber äs si fasch numä positivi Gfüäu... Dr Wäg het mir sicher Säubschtvertrouä erbracht... I gloubä wider chli meh dses ganz viu gueti Lüt git uf derä Wäut... Ha wider chli meh vertrouä i mi u mini Entscheidigä... U i bi wider mau überwältigt vo mim Körper... U i bi dankbar... Dankbar für ganz viu Mönschä wo mi ungerstützä us guet mit mir meinä... Dankbar für mini Gsundheit u dankbar fürä Standart woni darf ir Schwitz gniessä! 

I möcht mi ganz Härzläch bi dr Ännelä bedankä für Ihri Geduld u iri Wort für irä Witz u iri treui Begleitig!😘

I möcht mi härzläch bir Magda u bir Funny bedankä... Üsi schicksalshaftegi Begägnig... Ke Autor häts besser chönnä schribä... Merciii für euä Humor für di tiefgründigä Gspräch... Merciii für dä ganz Unsinn... I bedankä mi für eui Begleitig... Dir syt wunderbar!😘

U ä letschtä Dank geit wider mau a euch mini liäbä läser... Vilä dank fürds mitlachä u mitlidä... Merciii für di vilä Sms... Dir heit mi i ganz viunä Momäntä tragä dür di schwärä Kilometer! I bedankä mi für eui ungerstützig! 

Für mi geits iz wider zrügg i mi Autag... Äs si di letschtä Zilä vo mim Blogg... I has sehr gnossä o dismau ä Köbuwägbloggerin dsi... Merciii a aui womi da drbi hei ungerstützt!